السبت، يناير ٠١، ٢٠٠٥

بيان بدء الربيع - أحمد حداد



على مستواك يا نظر
يافطة تسد القمر
إعلان لفيلم جديد
"عودة رعاة البقر"

عودة بريطانيا تاني
في الشكل الأمريكاني
صوت النشرة الكئيبة
يقطع كل الأغاني

التكنولوجيا التمام
تكنيك فشر فيتنام
تفوق حرب الكواكب
راحت على الألغام

كل البلاد بتشارك
أضخم إنتاج معارك
ولا شيء يقف قصاده
لا رقابة ولا جمارك

أمريكا طالعة تذيع
بيان بدء الربيع
تصبح على خير يا عالم
سنة سودة على الجميع

الحرب جاية جاية
إن شالله بقيصرية
ده قصف أمريكاني
يعني أكبر هدية

بغداد أيا بغداد
حِمل الكآبة زاد
ومعايا بعد الله
أشعار فؤاد حداد

أنا مش خايف نهايتي
مستني الوقت يأتي
فن الإجرام هوايته
والموت أصبح هوايتي