الأربعاء، نوفمبر 23، 2005

سماء منخفضة - محمود درويش




هُنَالِكَ حُبٌّ يسيرُ على قَدَمَيْهِ الحَرِيرِيَّتَيْن
سعيدًا بغُرْبَتِهِ في الشوارع،
حُبٌّ صغيرٌ فقيرٌ يُبَلِّلُهُ مَطَرٌ عابرٌ
فيفيض على العابرين:
( هدايايَ أكبرُ منّي
كُلُوا حِنْطَتي
واشربوا خَمْرَتي
فسمائي على كتفيَّ وأَرضي لَكُمْ )...
هَلْ شمَمْتِ دَمَ الياسمينِ المُشَاعَ
وفكَّرْتِ بي
وانتظرتِ معي طائرًا أَخضرَ الذَيْلِ
لا اسْمَ لَهُ؟
هُنَالِكَ حُبٌّ فقيرٌ يُحدِّقُ في النهرِ
مُسْتَسْلِمًا للتداعي: إلى أَين تَرْكُضُ
يا فَرَسَ الماءِ؟
عما قليل سيمتصُّكَ البحرُ
فامش الهوينى إلى مَوْتكَ الاِختياريِّ،
يا فَرَسَ الماء!
هل كنتِ لي ضَفَّتَينْ
وكان المكانُ كما ينبغي أن يكون
خفيفًا خفيفًا على ذكرياتِكِ ؟
أَيَّ الأغاني تُحِبِّينَ ؟
أيَّ الأغاني؟ أَتلك التي
تتحدَّثُ عن عَطَشِ الحُبِّ،
أَمْ عن زمانٍ مضى ؟
هنالك حُبّ فقير، ومن طَرَفٍ واحدٍ
هادئٌ هادئٌ لا يُكَسِّرُ
بِلَّوْرَ أَيَّامِكِ المُـنْتَقَاةِ
ولا يُوقدُ النارَ في قَمَرٍ باردٍ
في سريرِكِ،
لا تشعرينَ بهِ حينَ تبكينَ من هاجسٍ،
رُبَّما بدلاً منه،
لا تعرفين بماذا تُحِسِّين حين تَضُمِّينَ
نَفسَكِ بين ذراعيكِ!
أَيَّ الليالي تريدين ؟ أيَّ الليالي ؟
وما لوْنُ تِلْكَ العيونِ التي تحلُمينَ
بها عندما تحلُمين؟
هُنَالِكَ حُبٌّ فقيرٌ، ومن طرفين
يُقَلِّلُ من عَدَد اليائسين
ويرفَعُ عَرْشَ الحَمَام على الجانبين.
عليكِ، إذًا، أَن تَقُودي بنفسِكِ
هذا الربيعَ السريعَ إلى مَنْ تُحبّينَ
أَيَّ زمانٍ تريدين ؟ أَيَّ زمان ؟
لأُصبحَ شاعِرَهُ، هكذا هكذا: كُلَّما
مَضَتِ امرأةٌ في المساء إلى سرِّها
وَجَدَتْ شاعرًا سائرًا في هواجسها.
كُلَّما غاص في نفسه شاعرٌ
وَجَدَ امرأةً تتعرَّى أَمام قصيدتِهِ...
أَيَّ منفىً تريدينَ؟
هل تذهبين معي، أَمْ تسيرين وَحْدَكِ
في اسْمك منفًى يُكَلَّلُ منفًى
بِلأْلاَئِهِ ؟
هُنالِكَ حُبٌّ يَمُرُّ بنا،
دون أَن نَنْتَبِهْ،
فلا هُوَ يَدْري ولا نحن نَدْري
لماذا تُشرِّدُنا وردةٌ في جدارٍ قديم
وتبكي فتاةٌ على مَوْقف الباص،
تَقْضِمُ تُفَّاحَةً ثم تبكي وتضحَكُ:
(لا شيءَ، لا شيءَ أكثر
من نَحْلَةٍ عَبَرَتْ في دمي...
هُنالِكَ حُبّ فقيرٌ، يُطيلُ
التأمُّلَ في العابرين، ويختارُ
أَصغَرَهُمْ قمرًا: أَنتَ في حاجةٍ
لسماءٍ أَقلَّ ارتفاعًا،
فكن صاحبي تَتَّسعْ
لأَنانيَّةِ اثنين لا يعرفان
لمن يُهْدِيانِ زُهُورَهُما...
ربَّما كان يَقْصِدُني، رُبَّما
كان يقصدُنا دون أَن نَنْتَبِهْ
هُنَالِكَ حُبّ ...


محمود درويش

شكراً لعمرو على القصيدة

السبت، يوليو 23، 2005

لما نبقى لوحدنا - أحمد حداد



لما نبقى لوحدنا...مين قَدِنا
كل الطيور بتيجي ترتاح جنبنا
وسط الزحام بنتوه كتير عن بعضنا
لكن الخلا قادر يجمّع حبنا

لما بنبقى لوحدنا تحت القمر
والدنيا ليل والقلب بيحب السهر
وأما الطيور بتنادي من فوق الشجر
كل الحاجات الحلوة تبقى ملكنا

لما بنبقى لوحدنا باقول كلام
عمري ما قلته في القصايد والمنام
أصلك يا روح قلبي النسايم والغرام
وانتي الملاك اللي بيسعد أرضنا

لما بنبقى لوحدنا وفي إيدي عود
وإنتي نايمة في المطر وسط الورود
ياللي إنتي أجمل بنت عايشة في الوجود
ومن المطر...وحده الوتر يعزفلنا

لما بنبقى لوحدنا باقول باحبك
نامي في قلبي ونيميني جوه قلبك
تعالي مرة زوريني في جزيرتي بقى
نفسي القمر ييجي ويسكن عندنا


(أحمد حداد من ديوان "الورد اللي بيطلع" (المركز المصري العربي – 2000

الأربعاء، يوليو 13، 2005

كنقطة عتمة في الضوء - سوزان عليوان



بإمكانِ كُلٍّ منّا
.ألاّ ينامَ وحيدًا

لماذا لا تحرّكُ مقبضَ بابي
في هذه اللحظةِ
وتدخلُ
كضوءٍ
في العتمة؟
تجلسُ إلى حافةِ سريري
تعيشُ أرقي
والقهوةَ
وموسيقى روحٍ تجلّتْ؟

لماذا لا تأتي
كنجمةٍ بردانةٍ
تختبئُ تحت لحافي؟

قلبي يتيمٌ
كنقطةِ عتمةٍ
.في الضوءِ


لماذا لا تفاجئني
وتحرّكُ مقبضَ البابِ
فالستائرَ
فعدّةَ القهوةِ
وجهازَ التسجيل؟


لديَّ صمتٌ كثيرٌ
و بنٌّ رائعٌ
و اسطواناتٌ مجنونةٌ
.أعرفُ أنّك تُحبُّها


سوزان عليوان

"من ديوان "لا أشبه أحداً

الأربعاء، يونيو 29، 2005

كما لو في حلم - سوزان عليوان




كانَ يحلمُ
و كانت، هي أيضًا، تحلمُ
و في معادلةٍ عجيبةٍ
تعجزُ عن تفسيرِها كلُّ علومِ العالم )
(و يشرحُها، بكُلِّ بساطةٍ، بائعُ وردٍ متجوِّل
التقيا
كما لو في حلمٍ
و حينَ تعانقت أصابعُهُما
لأوَّلِ مرَّةٍ
ابتسما
ابتسامةً كبيرة
مثلَ قمرٍ
اكتمل
:بنجمتيْنِ
يدُهُ
و يدُها
المشبوكتانِ
.بوردةٍ حمراء



سوزان عليوان

من ديوان "لنتخيل المشهد" - بيروت 2004


الأربعاء، يونيو 01، 2005

ازرع كل الأرض مقاومة


ازرع كل الأرض مقاومه
ترمي في كل الأرض جدور
ان كان ضلمه تمد النور
وان كان سجن تهد السور
كون البادئ كون البادئ
كل فروع الحق بنادق
غير الدم ماحدش صادق
من أيام الوطن اللاجئ
إلى يوم الوطن المنصور
ازرع كل الأرض مقاومه


فؤاد حداد
من ديوان الحَمْـل الفلسطيني

الخميس، مايو 26، 2005

باحبها...وألعن أبوها بعشق زي الداء


على اسم مصر التاريخ يقدر يقول ما شاء
أنا مصر عندي أحب وأجمل الأشياء
باحبها وهيّ مالكه الأرض شرق وغرب
وباحبها وهيّ مرمية جريحة حرب
باحبها بعنف وبرقة وعلى استحياء
وأكرهها وألعن أبوها بعشق زي الداء
وأسيبها وأطفش في درب وتبقى هيّ ف درب
وتلتفت تلاقيني جنبها في الكرب
والنبض ينفض عروقي بألف نغمة وضرب
على اسم مصر


صلاح جاهين

"من قصيدة "على اسم مصر

أهديها النهارده لكل الناس اللي استفتوا وما استفتوش واتضربوا وما اتضربوش على اسم مصر

الجمعة، مايو 06، 2005

الأمل - فؤاد حداد


يا دمعة العين ما تخافيش تجرى
لابد منك في الحماس الحق
الدنيا صيف والجو مش أخضر
و الموت ماهوش في صفحة الوفيات
ولابد من إتنين
الجوع وناكل
العطش ونشرب
الحياة والموت
الهزيمة وننتصر
الصبر
لاكن مافيش صبر في الدنيا يقدر
وإن كنت عمري ميت سنه
وإن كنت ميت ألف لاجئ
ما فيش صبر في الدنيا يقدر يفطمني عن وطني



فؤاد حداد
"قصيدة "الأمل
"من ديوان "الحمل الفلسطيني

الأربعاء، أبريل 20، 2005

كل الكل - فؤاد حداد


هات كل الدنيا تنوّر
هات كل الدنيا تغني


أنا صاحي الفجر وخايف
لا النسمه تكون قلقتها
أنا باسأل عنها لقيتها
الحلوه بتسأل عني
أنا زي الحنه في إيدها
هات كل الدنيا تغني
هات كل الدنيا تنوّر


أنا زي الحنه في إيدها
زي الحنه في الكف
باتشمّس تحت السقف
أنا ليله جديده وألف
زي الزغروطه في ريقها
هات كل الدنيا تنوّر
هات كل الدنيا تغني


زي الزغروطه في ريقها
تعرف للجنه طريقها
أنا قلبي الطاير طاير
بيسبح للي خالقها
أنا زي الحلم معاها
هات كل الدنيا تنوّر
هات كل الدنيا تغني


أنا زي الحلم معاها
الدنيا اللي مطاوعاها
م الفرحه مش سايعاها
والرايحة تقول للجايه
والحنه تقول للفل
هات كل الدنيا تنوّر
هات كل الدنيا تغني


الحنه تقول للفل
والشمس تقول للقمره
والريحه تقول للزينه
إحنا بقينا لبعضينا
هات كل الكل الكل
هات كل الدنيا تغني
هات كل الدنيا تنوّر


(من ديوان عيل على المعاش (الشخاليل

الاثنين، أبريل 18، 2005

الأبجدية - أمين حداد


الف أحبك
وبه باحبك
وبه وته
دايماً يا بت
دايماً باحبك


والثه باثأثأ
وأقول باحبك


والجيم جوابي
يقول باحبك


والحه حواسي
وحب عيني
وحُر مالي
حلق في ودنك
يقول باحبك


وخه ودال
خدك يندي
ياخد ويدي
مع شفايفي
أكتب في كفي
أنا باحبك


والذال ذكاوه
عريس نقاوه
يقول باحبك


والره ترقرق
ربيع بينطق
ورب شاهد
إني باحبك


يا زين باحبك
والسين يا سمره
يا سمسميه
سيفك سرقني
قلبي سبقني
وقال باحبك


والشين شقاوه
والصاد صبيه
والضاد بتضوي
ضفيره طايره
ضربت في قلبي
ضحكت عينيا
ضمت عينيكي
قالت باحبك


والطه طعامه
وطبله دقت
ودماغي طقت
طارت حمامه
قالت باحبك


والظه ظريفه
والعين عوافي
يا عيون عفيفه
يا عش دافي
أنا باحبك


والغين غنايا
أنا باحبك


والليل غطايا
كلمة باحبك


والفه طفوله
وفص فوله
وفي قلبي فالح
فدان موالح
واليوستفندي
يقول باحبك


والقاف قواقع
صدف ولؤلؤ
وقلب طالع
م البحر يبرق
يقول باحبك


والكاف كلامك
بيشر سكر
وكركديه
ويقوللي بيتك
حيبقى بيتي
واللام لقيتك
بتلمي عيني
من الشوارع
وتلقفيني
ويا الملايكه
والميم ميعادنا
مأذون بلدنا
يوم الخميس
والنون ولادنا
نايمين في حضنك
والهه هاتيهم
وهدهديهم
وقولي هُو
ورضعيهم
لبن وماء
والواو سامعهم
بيقولوا واء
واليه يا ليل
مفيش أسيه
واليه ياسين
بيقول بهيه
والناي يقسم
ع الغنوه ديه
وأنا باحبك
بالأبجديه
أنا باحبك

أمين حداد من ديوان ريحة الحبايب

الثلاثاء، أبريل 12، 2005

كلام الليل - صلاح جاهين


كلام الليل كده
جميل زي الندى
ييجي النهار ويروح
ما يعود إلا صدى
كلام الليل كده


الليل نجومه كلام
لولي ودهب يا سلام
ونسيمه همس وغرام
والبدر سلطانه


الليل نجومه وعود
يا هنيا للموعود
والصبح كل العهود
ما كأنهم كانوا


الليل نجومه سطور
بيننا وبينه بحور
أول ما ييجي النور
تتهد عمدانه
وينادي كروانه
كلام الليل كده


كلام الليل كده
جميل زي الندى
ييجي النهار ويروح
ما يعود إلا صدى
كلام الليل كده


"من ديوان "منوعات غنائية




شوفي قد إيه - صلاح جاهين


يا بخت من يقدر يقول
واللي ف ضميره يطلَّعه
يا بخت من يقدر يفضفض بالكلام
وكل واحد يسمعه
يقف في وسط الناس ويصرخ : آه يا ناس
ولا ملام
ييجى الطبيب يحكي له ع اللي بيوجعه
يكشف مكان الجرح ويحط الدوا
ولو انكوى
يقدر ينوح
وانا اللي مليان بالجروح
ما اقدرش اقول
ما اقدرش ابوح
والسهم يسكن صدري ما اقدرش انزعه
شوفي قد إيه؟
احنا النهارده إيه في أيام السنه
شتا والا صيف
وفين أنا
إيه اللي وصّلنى هنا
أنا صاحب البيت والا ضيف
صوتي انحبس
ما اقدرش اقول
ما عرفش حاجه عشان اقول
ما اعرفش غيرك انتي بس
يا بت ياللي في حبك العقل اتهوس
مكان غريب
كأنه سجن كأنه مخدع لحبيب
كأنه بير
شباك حديد وعليه ستاير من حرير
والريح بينفد منه زي المسامير
الريح عوى
قلبى انقبض
قلبى اتلوى
الشمس تلج اصفر شعاعها صاروخ هوا
الضلمه تلج اسود كتير
ألوف ألوف القناطير
خبيني في شعورك يا بت
أحسن عروقى اتخشِّبت
شعرك خشن زى الحِرام الصوف يا بت
خبيني فيه م الزمهرير ..
ونَيِّميني في السرير
دخل النبى بردان خديجه لَفِّته
حَطِّت عليه غطيان لحد ما دَفِّته
دخل النبى بردان وقال: فين الغطا
البسمة غطت شفِّته

السبت، أبريل 09، 2005

بلد الحبايب - أمين حداد



يا غربه يا غربه كفايه
إمتى الحبيب يبقى معايا
وارجع لفرشي وغطايا
ارجع حضن الحبايب


هافف عليا نسيم بلدي
في الغربه وانا عايش وحدي
نزلت دموعي على خدي
آه يا بلد الحبايب


نزلت دموعي على صدري
كان إيه خلعني من جدري
دا حبيبي كان راسه في حجري
فين يا دموع الحبايب


بقالي سنتين ع الحال ده
مهموم ووحيد فرشتي بارده
حلمت بيه ماسك ورده
فين يا ورد الحبايب


بقالي سنتين لم شفته
طلعت م المحفظه صورته
يا ريتني قبل ما جيت شرته
فين يا صورة الحبايب


بقالي سنتين لم ريته
في الحلم عديت على بيته
لقيته نايم غطيته
فين يا ريحة الحبايب


أمين حداد من ديوان حلاوة الروح

الأربعاء، أبريل 06، 2005

الـبُـن - فؤاد حداد


القهوه تحبّ كنكه
والكنكه تحب كنبه
والكنبه تحب قعده
مبسوطة مربّـعه
وكـنّـا أربـعـه
أنا وانتِ وأنا وانتِ


وكنا عيون كتير
وطبلـيّـه وزير
ولا بنحبّ نبكي
ولا بنعرف نطير
أنا وانتِ وأنا وانتِ


سبنا البوسطه ورانا
في الترماي اللي داير
العـتـبـه للإمـام
كان ريقك جنبي ساكت
حـبّـيـتك من زمان
أنا وانتِ وأنا وانتِ


شـمّـيت لادن سعيد
شـمّـيـته من بعيد
شـمّـيـته من قريّب
خمس سنين حاغـيّب
على الشماعه خايـف
وباخاف على الدولاب
وبادوب على البـلاط
وباحسّ الظـله تـقلت
وباسـمع الوابـور
وباحسّ المـيّـه تقلب
أنا وانتِ وأنا وانتِ


الظُهر الشمس تلحس
الظله في الليمـان
والظهر الشمس تعمل
سيبرتايه دهـب
بصينا لبعض فيها
ومشينا لبعض نبكي
وقعدنا من التعب
أنا وانتِ وأنا وانتِ


باقول لك إيه باقول لك
حاجيب حاجات قديمه
قلبي كوره شراب
نلعب والا ما نلعب
فرحت لنا المدينه
وامبارح في التراب
أنا وانتِ وأنا وانتِ


وبنفرش ضينا
على ظلّة بعضنا
واحنا بنبرد هناك
علشان ندفا هنا
والقهوه تقول لنا
على بال النار ما تلسع
بتبقى حنـيّـنه
أنا وانتِ وأنا وانتِ

الجمعة، مارس 25، 2005

الطير الجنايني - فؤاد حداد


فؤاد حداد

منين يا عم إبراهيم
قال لي أنا من الطير
يا ميت صباح النعيم
ويا ميت صباح الخير
ما أحلى الشقا لما أشقى
بقلب أعقل وأشقى
من العقول الشقيّه
أعدل جناح الطاقيه
وافتح عراوي الصدير
لسه في حياتي بقيّه
تسأل عيوني اللي عاشقه
الطير مزاج والا نشأه
والا الغرام اللي جابني
والجو صاحي عجبني أقول لك الحق يا ابني
كلنا من الطير


* * *


أقول لك الحق يا ابني كلنا من الطير
ولولا بين الجناين والشجر ما نعيش
وهدومنا لسه عليها من عيدان العش
يا ميت صباح النعيم
أنا اللي صاحي أهيم
واغني للورد يستاهل صوابعي شموع
بحس هادي ونادي وسندسي ومسموع

ياسمينه - أمين حداد


كلام مسجون بيتنطط على لساني
يا شوق بالليل ينام دفيان في أحضاني
وادور بعينيا بين الزهر والفراشات
وأتلون بلون الفجر والبساتين
وأرجع تاني أندهلك
خدودك شفشق الشربات
شفايفك شرقانين للبوس
وعينك لون عيدان القمح


باخبط ع البيبان وبالف ع الأصحاب
وباطلع ع السطوح بالليل
انادي عليكي واتكلم كلام سكران
وأرمي عيوني من فوق السطوح للناس
أنادي عليكي واتمرجح مع الصبيان
يا ياسمينه
يا روح مشنوقه في جنينه
على الجدران
وباتكلم مع الجدران
...باحبك
باحبك وانتي مكسوفه
باحبك وانتي بتذاكري
باحبك وانتي حيرانه
باحبك لما تتاخري
باحبك والميعاد وخري
باحبك أولي وآخري
باحبك زرع وسنابل
باحبك يللا نتقابل
ونتكلم ونتألم
وأضمك جوه أحضاني
مادمنا اتنين...خلاص حنعيش
ونفرح بالربيع والورد
وندفا في الشتا والبرد
نخاف لكن...نطمن بعض

أمين حداد من ديوان ريحة الحبايب


الأحد، مارس 20، 2005

سوناتا 3 - صلاح جاهين


صلاح جاهين


،عربيتين، محملين غُنا
...وصريخ بنات، وقهقهة رجال
،يا خسارة ماحناش ويا بعضنا
.ناس للجنوب وناس للشمال


،عربيتين دول، والا قبضتين
،مقسّمينا، قسمة القدر
...كأنهم أرضين في دنيتين
!احنا بشر يا حبيبتي، مش شجر


،جار بعضنا فايتين، نظرت لك
،عيوننا جابت في الحلال وليد
،لو بِعْدت العربيتين هلك
...وهو بين الشبّاكين عنيد


!أنا بارتعش، وانتي...بترجفي
.بس الولد، باين عليه عَفِي



الجمعة، مارس 04، 2005

ليه يا أمينة - أمين حداد




الشمس بتضرب زمامير
وتفتح شبابيك الغرفة
يا حبيبتي دي كل العصافير
بتعيش وتموت بالصدفة


أنا عايش في الحلم الصيفي
والصوت اللي في ودني يشخلل
غويشاتك ياللي على كتفي
راح اشوفك إمتى وأصهلل


بفرد جسمي زي النيل
وارفع إيدي زي الدلتا
بيني وبينك صبر جميل
ساكنه في قلبي في أجمل حته


مش عارف اذاكر ولا افكر
وبازعق زي المجنون
أنا من غيرك ميه بسكر
لموناته مش لاقيه لمون


الألوان الغامقة رزينة
والألوان الفاتحة تغش
صور الزيت علشان الزينة
والصالونات معمولة بقش
صورتي لوحدي حزينة حزينة
صورتي معاكي عسل وطحينة
قاعدة لوحدك ليه يا أمينة
الأيام دي ما تتعوضش


أمين حداد من ديوان ريحة الحبايب

الأحد، فبراير 27، 2005

قطرة المطر - عبد الوهاب البياتي


كقطرة المطر
ًكنت وحيدا
،آه يا حبيبتي
كقطرة المطر
لا تحزني
سأشتري غداً لك القمر
ونجمة الضحى
وبستاناً من الزهر
غداً إذا عدت من السفر
غداً إذا أورق في ضلوعي الحجر
لكني، اليوم، وحيد
... آه يا حبيبتي
كقطرة المطر

عبد الوهاب البياتي

الأربعاء، فبراير 09، 2005

بيني وبينك - نجيب سرور



بيني وبينك سور ورا سور
وأنا لا مارد ولا عصفور
في إيدي ناي رنان وجسور
وصبحت أنا في العشق مثل
والبحر بيضحك ليه
وأنا نازله اتدلع املا القلل


نجيب سرور

الاثنين، فبراير 07، 2005

يامه مويل الهوى - أحمد فؤاد نجم


يامه مُوَيل الهوى" موال فلسطيني مصري، أورده هنا كما غناه الشيخ إمام"

يامه مُوَيل الهوى
يا أمه مويليا
طعن الخناجر ولا
حكم الخسيس فيا

الصبر حلم العواجز
يطرح زهور الأماني
والقهر عدَّى الحواجز
وأنا اللي واقف مكاني
شايف غيطان البشاير
خايف. وكانن إديّا
عدى الحمام اللي طاير
مارضيش يرفرف عليّا

سألت شيخ الطريقه
مارضيش يجاوب سؤالي
ودارى عني الحقيقه
وفاتني حاير ف حالي
سألت شيخ الأطبا
داوى الجراح اللي بيا
نظر لي
نظرة محبه
وقال دوايا بإيديا

يا مصر
وإنتي الحبيبه
وإنتي اغترابي وشقايا
وإنتي الجراح الرهيبه
وإنتي اللي
عندك دوايا
علمني حبك عِباره
سهله
وبسيطه
وعفيّه
شرط المحبّه الجساره
شرع القلوب الوفيه

يامه مُوَيل الهوى
يامه مويليا
طعن الخناجر
ولا
حكم الخسيس فيا


أحمد فؤاد نجم
الأعمال الكاملة - دار الأحمدي للنشر


السبت، فبراير 05، 2005

أمــي - محمود درويش


تلح عليّ هذه الأغنية منذ بضعة أيام: "أمي" من أشعار محمود درويش ويغنيها مارسيل خليفة


أحنُّ إلى خبز أمي
وقهوة أمي
...ولمسة أمي
وتكبرُ فيَّ الطفولة
يوماً على صدرِ يوم
وأعشق عمري لأني
،إذا مُتُّ
!أخجل من دمع أمي

خذيني، إذا عدت يوماً
وشاحاً لهُدبِك
وغطي عظامي بعشب
تعمد من طهر كعبك
...وشُدّي وثاقي
...بخصلة شعر
.بخيطٍ يلوِّح في ذيل ثوبك
عساني أصير إلهاً
...إلهاً أصير
!إذا ما لمستُ قرارة قلبك

ضعيني، إذا ما رجعتُ
وقوداً بتنور نارك
وحبل غسيل على سطح دارك
لأني فقدت الوقوف
بدون صلاة نهارك

هَرِمتُ، فردّي نجوم الطفولة
حتى أُشارك
صغار العصافير
...درب الرجوع
!لعُشِّ انتظارِك

الجمعة، يناير 28، 2005

النملة - تميم البرغوثي



أنا نملة واقعة ف رغوة الصابون
قاعد أرَفَّس هل أكون أو لا أكون
مجنون
لا في تحتي أرض اسند عليها
و لا ف إيديا حاجة أمسك فيها
أصرخ الحقوني يا ناس ح أموت
،نَفَسي اتقطَع و لا حدَّ حاسس بيّا
،ملغي من الحساب
و كأن ربّي حطّني ع الأبجدية سكون
ما أنا نملة واقعة في رغوة الصابون
* * *
و الرغوة من حَوَالَياَّ كبرت
زي مارد لسه سايب قمقمه للتو
واقف يطقطق ضهره و يشمّ الهوا
رِجلُه أمامي و راسه فوق في الجَو
بيبُص لي كده باحتقار
و أنا في الكرامة مفيش هزار
أنا قلت أزعق فيه فتحصل معجزة
يمكن إلهي يسخطه مثلاً أو انه يختفي
،و ما هوش بعيد على ربنا
،تبقى تراجيديا تتقلب كرتون
ما حصلش طبعاً للأسف
و فضلت نملة ف رغوة الصابون
* * *
نفش الصابون أصبح ميدان تحرير
و من الرغاوي وقف مجمّع و البشر طوابير
إشارات مرور زحمة و زفّة ماشية بالزمامير
باليل تلاقي الإعلانات وَيّا المثقف
قايمة بالتنوير
و الحُكم للون الرمادي
المنتخب بالإختيار الحر للجماهير
جماهير
إذا ما شفتها لما تقوم الصبح
من نومها و تسعى لشغلها
دقَّق على الكفين و في الرجلين
تلاقي مطرح المسامير
يا ميدان سخيف
كما حصة التعبير
يا ساطور مخيف
فوق البشر مسنون
أمرك و أمري يهون
ما أنا في النهاية نملة و انت رغوة الصابون
* * *
نَفَش الصابون أصبح بلاد عربية
مصحف شهيد رايح يرُدّ الضيم
عن أرض العرب
مصحف ذهب
بيمرجحه صدر البنيَّة ف سلسلة دهبية
يا بلاد عجب
هزيمتها قطعة عفش جُوا كل بيت أساسية
زي الستاير و الكَنَب
،أمة رغاوي بس أحزانها حديد
مَلوِي و متزخرف كأبواب القصور
و الموت يهاتي مشغّلينه مسحراتي
يلف ف كل الشهور
مش بس شهر الصوم
إصحوا بقى من النوم
أو نامي نامي للأبد يا عيون
يا أمة ساكن فيها لكن بيها أنا مسكون
أمرك و أمري يهون
ما أنا في النهاية نملة و انتي رغوة الصابون
* * *
نَفَش الصابون بقى هوَّ هوَّ الكُون
إطلع على القمر الصناعي و شوف
تلاقيها ورطة و كلّنا فيها
و ما لكش مهرب منها غير ليها
ما تشوفش من حواليها إلا سواد
و خلطة من العدم و الخوف
نقطة و طايرة في الهوا
يا نعيش سوا يا نموت سوا
كوكب لوحده قوي
كأنه طفل تاه من أهله
أو مخطوف
إنزل من القمر الصناعي و شوف
شوف بهلوان
وشّه سبع ألوان
عمل سلطان
قعد ع العرش
يحكم عليك، تضحك تقول ده هزار
و تُدرك لما يبقى الدم منك للركب
،إنه ما بيهزرش
شوف الأمل يوجع
كما الروماتيزم في العضم العجوز
،شوف بحر مالح
لو تعوز تشرب
و لو تشرب تعوز
يا سيرك يا للي اسمه اصطلاحاً كون
يا ضخم يا زغَنّون
أمرك و أمري يهون
ما أنا في النهاية نملة و أنت رغوة الصابون
* * *
نَفَش الصابون بقى موت
جاي لي بيجري فاتح الأحضان
أهلاً و سهلاً يا حَنون
إنشلني من دي الورطة
و ابقالك أنا ممنون
ما تخافش من دِيّة و لا من تار
ده أنا و الله قليل العون
خدني و أمري يهون
،ما أنا في النهاية نملة و انت
،حتى انت
رغوة الصابون

(تميم البرغوثي من ديوان "المنظر – أشعار بالعامية المصرية" – دار الشروق – الطبعة الأولى 2002)

قالولي بتحب مصر فقلت مش عارف - تميم البرغوثي




قالولي بتحب مصر فقلت مش عارف
المعنى كعبة وانا بوَفْد الحروف طايف
وألف مغزل قصايد في الإدين لافف
قالولي بتحب مصر فقلت مش عارف
أنا لما اشوف مصر ع الصفحة بكون خايف

ما يجيش في بالي هرم ما يجيش في بالي نيل
ما يجيش في بالي غيطان خضرا وشمس أصيل
ولا جزوع فلاحين لو يعدلوها تميل
حكم الليالي ياخدهم في الحصاد محاصيل
ويلبّسوهم فراعنة ساعة التمثيل
وساعة الجد فيه سخرة وإسماعيل
ما يجيش في بالي عرابي ونظرته في الخيل
وسعد باشا وفريد وبقيّة التماثيل
ولا ام كلثوم في خِمسانها ولا المنديل
الصبح في التاكسي صوتها مبوظُّه التسجيل
ما يجيش في بالي العبور وسفارة اسرائيل
ولا الحضارة اللي واجعة دماغنا جيل ورا جيل
قالولي بتحب مصر أخدني صمت طويل
وجت في بالي ابتسامة وانتهت بعويل

قالولي بتحب مصر فقلت مش عارف
لكني عارف بإني إبن رضوى عاشور
أمي اللي حَمْلَها ما ينحسب بشهور
الحب في قلبها والحرب خيط مضفور
تصبر على الشمس تبرد والنجوم تدفى
ولو تسابق زمنها تسبقه ويحفى
تكتب في كار الأمومة م الكتب ألفين
طفلة تحمّي الغزالة وتطعم العصفور
وتذنِّب الدهر لو يغلط بنظرة عين
وبنظرة أو طبطبة ترضى عليه فيدور

وأمي حافظة شوارع مصر بالسنتي
تقول لمصر يا حاجّة ترّد يا بنتي
تقولها احكي لي فتقول ابدأي إنتي

وأمي حافظة السِيَر أصل السِيَر كارها
تكتب بحبر الليالي تقوم تنوَّرْها
وتقول يا حاجة إذا ما فرحتي وحزنتي
وفين ما كنتي أسجل ما أرى للناس
تفضل رسايل غرام للي يقدّرها

أمي وأبويا التقوا والحر للحرة
شاعر من الضفة برغوثي وإسمه مريد
قالولها ده أجنبي، ما يجوزش بالمرة
قالت لهم ياالعبيد اللي ملوكها عبيد
من إمتى كانت رام الله من بلاد برة
يا ناس يا أهل البلد شارياه وشاريني
من يعترض ع المحبة لما ربّي يريد

كان الجواب ان واحد سافر اسرائيل
وانا أبويا قالوله يللا ع الترحيل

دلوقت جه دوري لاجل بلادي تنفيني
وتشيِّب أمي في عشرينها وعشريني
يا أهل مصر قولولي بس كام مرة
ها تعاقِبوها على حُبَّ الفلسطيني

قالولي بتحب مصر فقلت مش عارف

بحب أقعد علىالقهوة بدون أشغال
شيشة وزبادي ومناقشة في مآل الحال
وبصبصة ع البنات اللي قوامهم عال
لكن وشوشهم عماير هدها الزلزال
بحب لمعي وحلابِسَّة ومُحِّب جمال
أروح لهم عربية خابطة في تروللي
كإنها ورقِة مِسودّة مرميّة
جوّاها متشخبطة ومتكرمشة هيّه
أو شلّة الصوف، أو عقدة حسابيّه
سبعين مهندس ولا يقدر على حلي
فيجيبوا كل مفكّاتهم وصواميلهم
ويجرّبوا كل ألاعيبهم وتحاييلهم
ساعات كمان يغلطوا ويجربوا فيّه
بس الأكيد أنهم بيحاولوا في مشاكلي
وإنها دايماً أهون من مشاكلهم

أحب اقعد على القهوة مع القاعدين
وابص في وشوش بشر مش مخلوقين من طين
واحد كإنه تحتمس، يشرب القرفة
والتاني غلبان يلف اللقمة في الجرانين
والتالتة من بلكونتها تنادي الواد
والواد بيلعب وغالبهم ثلاثة اتنين
أتوبيس كإنه كوساية محشي بني آدمين
أقول بحكم القاموس، إن الهواء جماد
واشم ريحة شياط بس اللي شايفه رماد
عكازة الشيخ منين نابت عليها زناد
يسند على الناس ويعرج من شمال ليمين
والراديو جايب خبر م القدس أو بغداد

قالولي بتحب مصر فقلت مش عارف

قطر الندى قاعدة بتبيع فجل بالحزمة
أميرة عازز عليها تشحت اللقمة
عريانة ما سترها الا الضل والضلمة
والشعر الابيض يزيد حرمة على حرمة
والقلب قايد مداين زي فرشة نور
والفرشة واكلاها عتة والمداين بور
اللي يشوفها يقول صادقة حكاوي الجن
واللي يشوفها يقول كل الحقايق زور

عزيزة القوم عزيزة تشتغل في بيوت
عشر سنين عمرها لكن حلال ع الموت
صبية تمشي تقع ويقولو حكم السن
وسِتّها شعرها أصفر وكلّه بُكَل
كإنها مربية فيه اربعين كتكوت
ووشها زي وش الحاكم العربي
كإن خالقها راسمها على نبوت
تحكم وقطر الندى تسمع لها وتئن
أصل البعيدة وليّة أمرها، عجبي
على الهوا بحجة الكسوة يقيموا له سور

أحكي يا قطر الندى والا ما لوش لازمة
حكاية ابن الأصول تفضل معاه لازمة
فيه ناس بتلدغ وناس ليها البكا لازمة
ياللي سطلت الخليفة بجوز عينين وشعور
كنت سما للأغاني والأغاني طيور
مين اللي باعك، عدوك، بعض أولادك
مين اللي كانوا عبيدك صاروا أسيادك
مين اللي سمى السلاسل في إديك دِبَل
مين اللي خط الكتاب مين كانوا أشهادك
وازّاي متى سألوكي "هل قبلتِ به"
سكتِّ ومشيتِ يا مولاتي في الزفة
لبنان وغزة وعراق فينا العدو تشفى
حطوا جثثنا يا حاجة تحت سجادك
ووقفت تستنى خيط الدم يبقى بحور

قالولي بتحب مصر فقلت مش عارف
لا جيتها سايح ولاني أعمي مش شايف
بلد علمها انمزع والرفّا في المساجين
ومهر مربوط في كارو وباله في البساتين
وابو زيد سلامة على كرسي وكيس جلوكوز
لجنة مشايخ تناقش فتوة الأراجوز
سؤال نعيش أو نموت، فيه لا يجوز ويجوز

لو السقوف خايخة نسندها بحجارة وطوب
لكن ده لوح القزاز كله ضرب تشريخ
لو الولد حرف في الآية، ها يبقى يتوب
بس المصيبة إذا الآية اخترعها الشيخ

يا مصر كومة حروف إبر المعاني فين
إبر بتجرح إيدينا قبل ما بتبان
نسرك في بال السما بيقول حدودها منين
نسرك بياكله الصدا في بدلة السجان

يا قلعة السجن يا قلعة صلاح الدين
أنا بقولك وأهلي ع الكلام شاهدين
لو كنت حرة ما كناش نبقى محتلين

والناس شكاير صريخ رابطين عليها سكوت
آهات سَكوتَة كإن الأرض مستشفى
مطرودة منها الدكاترة ف سجن أو منفى
والناس بتسأل هنصبر والا نتوفى
فيه ناس تقول زي بعضه دول نوعين م الصبر
وناس تقول زي بعضه دول نوعين م الموت
يا مصر بعض التسامح يبقى عار وبأجر
إفتكري "لا تحسبّن" مكتوبة فوق كام قبر
والتار يبات يصحى تاني لو يشيب الدهر
والتار حصان غير لصاحبه ما يلين ضهر
والتار تار العرب وعشان كده تار مصر

قالولي بتحب مصر فقلت مش عارف
لا جيتها سايح ولاني أعمى مش شايف
ولاني هايف اردّ بخفّة وبسرعة
وكل من رد يا كذاب يا هايف

أصل المحبة بسيطة ومصر تركيبة
ومصر حلوة ومُرَّة وشِرْحة وكئيبة
دا نا اختصر منصب الشمس وأقول شمعة
ولا اختصر مصر وانده مصر يا حبيبة

يا أهل مصر اسمعوني واسمعو الباقيين
إن كنت انا رحّلوني كلنا راحلين
يا أهل مصر يا أصحابي يا نور العين
يا شنطة المدرسة يا دفتر العناوين
يا ضغطة البنت بلكراسة ع النهدين
ترقص قصاد المراية، واحنا مش شايفين
يا صحن سلطان حسن يا صحن كحك وتين
يا ألف مدنا وجرس، لألف ملّة ودين
يا أهل مصر اسمعوني، والكلام أمانات
قلتولي بتحب مصر فقلت مش عارف
روحوا اسألوا مصر هيّه عندها الإجابات
تميم البرغوثي، عمان، 1 إبريل 2003













أمريكا صناعة محلّيّة - فؤاد حداد



يااصفر يا كهين الجاهليّة
كل ما بتهين المثاليّة
زي النَدّاغة العَسليّة
للتسليّة و التحليّة
و الفن بتصنع أمريكا
أمريكا صناعة محلّية

لما تشوف واحد بينادي
خايف مش عادي ولا معادي
من حركات البحر الهادي
و تقول له تعالى الناحية دي
و تغرقه… تصنع أمريكا
أمريكا صناعة محلّية

لما تقرّق علمي و أدبي
ع "الأرض بتتكلّم عربي"
و تقول بكرة الشيخ الدهبي
يطلع م الصاغة على التربي
النكتة بتصنع أمريكا
أمريكا صناعة محلّية

لمّا يكون لك ركن مقالة
تعمل عيّل ع الرجّالة
و ترص مسائل و سآلة
و غَلَت و جزارة علي بقالة
بتبيع إشي يصنع أمريكا
أمريكا صناعة محلّية

و اللي يقول ع الفرخة فُرُخْرُخ
للملوخيّة يقول يا مُلُخلخ
و يقول واوا علشان تصرخ
و يجيله كمان دكتور يملُخ

و يجَبَّر ...يصنع أمريكا
أمريكا صناعة محلّية


و حاجات و انا مش عاوز افَكَّر
ولا أكتبها بقلم باركر
علي فايق من كتر ما يسكر
من كتر تواضعه بيتفشخر
و كفاية بيصنع أمريكا
أمريكا صناعة محلّية

و كفاية بقى و الله كفاية
و لا عارف مرضي و لا شفايا

و المدرسة دخلوها حفايا
ضربوهم تاني على قفايا
يمكن كدة يصنعوا أمريكا
أمريكا صناعة محلّية

لكن أمريكا حرير بفتة
دبّورة فراشة مُتَهافْتة
تفّاحة مفعوصة و باهتة
سمسارة من الدرجة التالتة
أمريكا في خدمة أمريكا
أمريكا صناعة محلّية

و عجوزة أنا و ليه باتحَمِّس
و اطلب بعيوني اللي تدخمس
الفجر و إيدي اللي تدعبس
و اطَّمِن إنه بيتنَفِّس
و نموت ولا نصنع أمريكا
أمريكا صناعة محلّية

يااصفر يا كهين الجاهليّة
كل ما بتهين المثاليّة
زي النَدّاغة العَسليّة
للتسليّة و التحليّة
و المصلحة تصنع أمريكا
أمريكا صناعة محلّية



كاوبوي دينامو - فؤاد حداد



كاو بوى دينامو سايق غنمو
علق يافطة بعرض الريف
خلى أميركا تستعمركا
ست شريفة غرضها شريف

يوم ما بترمى عقب سيجارة
تفتح بيه توريد و تجارة
شق الحصلة، إزرع بصلة
!نخ و طاطى تبقى ظريف
...كاو بوى دينامو

!خليك جن، ولد جنية
شيل من راسك الوطنية
!نظف مخك الا تطخك
خليه خالى من التخاريف
...كاو بوى دينامو

لها فى اللعب فنون و براعة
فى مشاريع و بنوك و زراعة
!تشتل، تعتل، تفتل، تقتل
ست غنية عن التعريف
...كاو بوى دينامو

إطلع على مركبها ألافطى
قوللها خدى خلجاتى و نفطى
!دى المحبوبة! جاتك غيبوبة
مدرسة حرة بالمصاريف
...كاو بوى دينامو

حط دماغك تحت جناحها
إرضع فى البزازة منحها
بكرة تبيت راقد ميت
كيف الغاوى مع الحريف

كاو بوى دينامو سايق غنمو
علق يافطة بعرض الريف
خلى أميركا تستعمركا
ست شريفة غرضها شريف

بضاعة الأمريكان - فؤاد حداد



مسَحراتي منَقراتي
مرة ف حياتي دخلت سيما
:شفت إلّي آتي
كان يا مكان
حمار حصان
بجوزين حوافر و جوز ودان
عليه مُسافر شَجيع جَبان
يِشِبْ فوقه
و يحدف بطوقه
!و يقِل ذوقه عَيان بَيان
آدي ف الأمام
أحمر و هندي داهن دِهان
!دَه هندي هانْ
و ابو عين قويّة
بالبندقية هات يا نشان
!يقتل له مِيَّة و يمضغ لبان
و بعد غيبته
يرجع بخيبته
يحضن حبيبته
!شوف الحنان
و ده حلم والاّ
ده علم والاّ
!ده شيء جنان؟
!سهرتنا ضاعِت على بِضاعة الأمريكان

كان ليه ندوَّر في غير مكان؟
إحنا اللي نوّر فينا الأذان
لازم نطوَّر حواديت زمان
فن الميدان
شعر العروبة
بحر العذوبة و العنفوان
نبَتِت ولادي
في كل ناحية
!باهتِف لِتحي فنون بلادي

مختارات من رباعيات صلاح جاهين

مختارات من رباعيات صلاح جاهين

يا عندليب ماتخافش من غنوتك
قول شكوتك و احكي عن بلوتك
الغنوة مش هتموتك إنما
كتم الغنا هو اللي هيموتك
!عجبي

يا للي بتبحث عن إله تعبده
بحث الغريق عن أي شيء ينجده
الله جميل و عليم و رحمن رحيم
إحمل صفاته ... و انت راح توجده
!عجبي

غمض عينيك و امشي بخفة و دلع
الدنيا هي الشابة و انت الجدع
تشوف رشاقة خطوتك تعبدك
لكن انت لو بصيت لرجليك ... تقع
!عجبي

أوصيك يا ابني بالقمر و بالزهور
أوصيك بليل القاهرة المسحور
و إن جيت في بالك ... اشتري عقد فل
لأي سمرا ... و قبري إوعك تزور
!عجبي

لو فيه سلام في الأرض و طمان و أمان
لو كان مفيش و لا فقر و لا خوف و جبن
لو يملك الإنسان مصير كل شيء
أنا كنت أجيب للدنيا ميت ألف ابن
!عجبي

جالك أوان و عرفت مشي الجنايز
كيف شفتها يا عبد رب اللذايذ
قال: شفت شيل بالحيل فقير أو أمير
كما شالوا في الحمامير فواضي القزايز
!عجبي

يا للي انت بيتك قش مفروش بريش
تقوى عليه الريح. يصبح مفيش
عجبي عليك حواليك مخالب كبار
و ما لكش غير منقار و قادر تعيش
!عجبي

أيوب رماه البين بكل العلل
سبع سنين مرضان و عنده شلل
الصبر طيب ... صبر أيوب شفاه
بس الأكاده مات بفعل الملل
!عجبي

يا حزين يا قمقم تحت بحر الضياع
حزين أنا زيك و إيه مستطاع
الحزن ما بقالهوش جلال يا جدع
الحزن زي البرد ... زي الصداع
!عجبي

إقلع غماك يا تور و ارفض تلف
إكسر تروس الساقية و اشتم و تف
قال: بس خطوة كمان ... و خطوة كمان...
يا أوصل نهاية السكة يا البير يجف
!عجبي

أنا كل يوم أسمع ... فلان عذبوه
أسرح في بغداد و الجزاير و أتوه
ما اعجبش م اللي يطيق بجسمه العذاب
و أعجب م اللي يطيق يعذب أخوه
!عجبي

أنا قلبي كان شخشيخة أصبح جرس
جلجلت بيه صحيوا الخدم و الحرس
أنا المهرج ... قمتو ليه خفتو ليه
لاف إيدي سيف و لا تحت مني فرس
!عجبي

حبيت...لكن حب من غير حنان
وصاحبت لكن صُحبه مالهاش أمان
رحت لحكيم واكتر لقيت بلوتي
إن اللي جوّه القلب مش ع اللسان
!عجبي

إيش تطلبي يا نفس فوق كل ده
حظك بيضحك وانتي متنكدة
ردت قالت لي النفس: قول للبَشَر
ما يبصوليش بعيون حزينة كده
!عجبي

الدنيا أوده كبيرة للانتظار
فيها ابن آدم زيّه زي الحمار
الهم واحد...والملل مشترك
ومفيش حمار بيحاول الانتحار
!عجبي

بحر الحياه مليان بغرقى الحياه
صَرَخت خش الموج في حلقي ملاه
قارب نجاه!...صَرَخت قالوا مفيش
غير بس هو الحب قارب نجاه
!عجبي

إنشد يا قلبي غنوتك للجمال
وارقص في صدري من اليمين للشمال
ماهوش بعيد تفضل لبكره سعيد
ده كل يوم فيه ألف ألف احتمال
!عجبي

زحام وأبواق سيارات مزعجة
إللي يطول له رصيف...يبقى نجا
لو كنت جنبي يا حبيبي أنا
مش كنت أشوف إن الحياة مبهجه؟
!عجبي

إيديا في جيوبي وقلبي طِرب
سارح في غربة بس مش مِغترِب
وحدي لكين وَنسان وماشي كده
وبابتعد...ما اعرفش...أو باقترِب
!عجبي

فتحت شباكي لشمس الصباح
ما دخلش منه غير عويل الرياح
وفتحت قلبي عشان أبوح بالألم
ما خرجش منه غير محبة وسماح
!عجبي

أنا الذي عمري اشتياق في اشتياق
وقطر داخل في محطة فراق
قصدت نبع السم وشربت سم
من كتر شوقي وعشمي في الترياق
!عجبي

السبت، يناير 01، 2005

بيان بدء الربيع - أحمد حداد



على مستواك يا نظر
يافطة تسد القمر
إعلان لفيلم جديد
"عودة رعاة البقر"

عودة بريطانيا تاني
في الشكل الأمريكاني
صوت النشرة الكئيبة
يقطع كل الأغاني

التكنولوجيا التمام
تكنيك فشر فيتنام
تفوق حرب الكواكب
راحت على الألغام

كل البلاد بتشارك
أضخم إنتاج معارك
ولا شيء يقف قصاده
لا رقابة ولا جمارك

أمريكا طالعة تذيع
بيان بدء الربيع
تصبح على خير يا عالم
سنة سودة على الجميع

الحرب جاية جاية
إن شالله بقيصرية
ده قصف أمريكاني
يعني أكبر هدية

بغداد أيا بغداد
حِمل الكآبة زاد
ومعايا بعد الله
أشعار فؤاد حداد

أنا مش خايف نهايتي
مستني الوقت يأتي
فن الإجرام هوايته
والموت أصبح هوايتي