الأربعاء، أبريل ٢٠، ٢٠٠٥

كل الكل - فؤاد حداد


هات كل الدنيا تنوّر
هات كل الدنيا تغني


أنا صاحي الفجر وخايف
لا النسمه تكون قلقتها
أنا باسأل عنها لقيتها
الحلوه بتسأل عني
أنا زي الحنه في إيدها
هات كل الدنيا تغني
هات كل الدنيا تنوّر


أنا زي الحنه في إيدها
زي الحنه في الكف
باتشمّس تحت السقف
أنا ليله جديده وألف
زي الزغروطه في ريقها
هات كل الدنيا تنوّر
هات كل الدنيا تغني


زي الزغروطه في ريقها
تعرف للجنه طريقها
أنا قلبي الطاير طاير
بيسبح للي خالقها
أنا زي الحلم معاها
هات كل الدنيا تنوّر
هات كل الدنيا تغني


أنا زي الحلم معاها
الدنيا اللي مطاوعاها
م الفرحه مش سايعاها
والرايحة تقول للجايه
والحنه تقول للفل
هات كل الدنيا تنوّر
هات كل الدنيا تغني


الحنه تقول للفل
والشمس تقول للقمره
والريحه تقول للزينه
إحنا بقينا لبعضينا
هات كل الكل الكل
هات كل الدنيا تغني
هات كل الدنيا تنوّر


(من ديوان عيل على المعاش (الشخاليل

الاثنين، أبريل ١٨، ٢٠٠٥

الأبجدية - أمين حداد


الف أحبك
وبه باحبك
وبه وته
دايماً يا بت
دايماً باحبك


والثه باثأثأ
وأقول باحبك


والجيم جوابي
يقول باحبك


والحه حواسي
وحب عيني
وحُر مالي
حلق في ودنك
يقول باحبك


وخه ودال
خدك يندي
ياخد ويدي
مع شفايفي
أكتب في كفي
أنا باحبك


والذال ذكاوه
عريس نقاوه
يقول باحبك


والره ترقرق
ربيع بينطق
ورب شاهد
إني باحبك


يا زين باحبك
والسين يا سمره
يا سمسميه
سيفك سرقني
قلبي سبقني
وقال باحبك


والشين شقاوه
والصاد صبيه
والضاد بتضوي
ضفيره طايره
ضربت في قلبي
ضحكت عينيا
ضمت عينيكي
قالت باحبك


والطه طعامه
وطبله دقت
ودماغي طقت
طارت حمامه
قالت باحبك


والظه ظريفه
والعين عوافي
يا عيون عفيفه
يا عش دافي
أنا باحبك


والغين غنايا
أنا باحبك


والليل غطايا
كلمة باحبك


والفه طفوله
وفص فوله
وفي قلبي فالح
فدان موالح
واليوستفندي
يقول باحبك


والقاف قواقع
صدف ولؤلؤ
وقلب طالع
م البحر يبرق
يقول باحبك


والكاف كلامك
بيشر سكر
وكركديه
ويقوللي بيتك
حيبقى بيتي
واللام لقيتك
بتلمي عيني
من الشوارع
وتلقفيني
ويا الملايكه
والميم ميعادنا
مأذون بلدنا
يوم الخميس
والنون ولادنا
نايمين في حضنك
والهه هاتيهم
وهدهديهم
وقولي هُو
ورضعيهم
لبن وماء
والواو سامعهم
بيقولوا واء
واليه يا ليل
مفيش أسيه
واليه ياسين
بيقول بهيه
والناي يقسم
ع الغنوه ديه
وأنا باحبك
بالأبجديه
أنا باحبك

أمين حداد من ديوان ريحة الحبايب

الثلاثاء، أبريل ١٢، ٢٠٠٥

كلام الليل - صلاح جاهين


كلام الليل كده
جميل زي الندى
ييجي النهار ويروح
ما يعود إلا صدى
كلام الليل كده


الليل نجومه كلام
لولي ودهب يا سلام
ونسيمه همس وغرام
والبدر سلطانه


الليل نجومه وعود
يا هنيا للموعود
والصبح كل العهود
ما كأنهم كانوا


الليل نجومه سطور
بيننا وبينه بحور
أول ما ييجي النور
تتهد عمدانه
وينادي كروانه
كلام الليل كده


كلام الليل كده
جميل زي الندى
ييجي النهار ويروح
ما يعود إلا صدى
كلام الليل كده


"من ديوان "منوعات غنائية




شوفي قد إيه - صلاح جاهين


يا بخت من يقدر يقول
واللي ف ضميره يطلَّعه
يا بخت من يقدر يفضفض بالكلام
وكل واحد يسمعه
يقف في وسط الناس ويصرخ : آه يا ناس
ولا ملام
ييجى الطبيب يحكي له ع اللي بيوجعه
يكشف مكان الجرح ويحط الدوا
ولو انكوى
يقدر ينوح
وانا اللي مليان بالجروح
ما اقدرش اقول
ما اقدرش ابوح
والسهم يسكن صدري ما اقدرش انزعه
شوفي قد إيه؟
احنا النهارده إيه في أيام السنه
شتا والا صيف
وفين أنا
إيه اللي وصّلنى هنا
أنا صاحب البيت والا ضيف
صوتي انحبس
ما اقدرش اقول
ما عرفش حاجه عشان اقول
ما اعرفش غيرك انتي بس
يا بت ياللي في حبك العقل اتهوس
مكان غريب
كأنه سجن كأنه مخدع لحبيب
كأنه بير
شباك حديد وعليه ستاير من حرير
والريح بينفد منه زي المسامير
الريح عوى
قلبى انقبض
قلبى اتلوى
الشمس تلج اصفر شعاعها صاروخ هوا
الضلمه تلج اسود كتير
ألوف ألوف القناطير
خبيني في شعورك يا بت
أحسن عروقى اتخشِّبت
شعرك خشن زى الحِرام الصوف يا بت
خبيني فيه م الزمهرير ..
ونَيِّميني في السرير
دخل النبى بردان خديجه لَفِّته
حَطِّت عليه غطيان لحد ما دَفِّته
دخل النبى بردان وقال: فين الغطا
البسمة غطت شفِّته

السبت، أبريل ٠٩، ٢٠٠٥

بلد الحبايب - أمين حداد



يا غربه يا غربه كفايه
إمتى الحبيب يبقى معايا
وارجع لفرشي وغطايا
ارجع حضن الحبايب


هافف عليا نسيم بلدي
في الغربه وانا عايش وحدي
نزلت دموعي على خدي
آه يا بلد الحبايب


نزلت دموعي على صدري
كان إيه خلعني من جدري
دا حبيبي كان راسه في حجري
فين يا دموع الحبايب


بقالي سنتين ع الحال ده
مهموم ووحيد فرشتي بارده
حلمت بيه ماسك ورده
فين يا ورد الحبايب


بقالي سنتين لم شفته
طلعت م المحفظه صورته
يا ريتني قبل ما جيت شرته
فين يا صورة الحبايب


بقالي سنتين لم ريته
في الحلم عديت على بيته
لقيته نايم غطيته
فين يا ريحة الحبايب


أمين حداد من ديوان حلاوة الروح

الأربعاء، أبريل ٠٦، ٢٠٠٥

الـبُـن - فؤاد حداد


القهوه تحبّ كنكه
والكنكه تحب كنبه
والكنبه تحب قعده
مبسوطة مربّـعه
وكـنّـا أربـعـه
أنا وانتِ وأنا وانتِ


وكنا عيون كتير
وطبلـيّـه وزير
ولا بنحبّ نبكي
ولا بنعرف نطير
أنا وانتِ وأنا وانتِ


سبنا البوسطه ورانا
في الترماي اللي داير
العـتـبـه للإمـام
كان ريقك جنبي ساكت
حـبّـيـتك من زمان
أنا وانتِ وأنا وانتِ


شـمّـيت لادن سعيد
شـمّـيـته من بعيد
شـمّـيـته من قريّب
خمس سنين حاغـيّب
على الشماعه خايـف
وباخاف على الدولاب
وبادوب على البـلاط
وباحسّ الظـله تـقلت
وباسـمع الوابـور
وباحسّ المـيّـه تقلب
أنا وانتِ وأنا وانتِ


الظُهر الشمس تلحس
الظله في الليمـان
والظهر الشمس تعمل
سيبرتايه دهـب
بصينا لبعض فيها
ومشينا لبعض نبكي
وقعدنا من التعب
أنا وانتِ وأنا وانتِ


باقول لك إيه باقول لك
حاجيب حاجات قديمه
قلبي كوره شراب
نلعب والا ما نلعب
فرحت لنا المدينه
وامبارح في التراب
أنا وانتِ وأنا وانتِ


وبنفرش ضينا
على ظلّة بعضنا
واحنا بنبرد هناك
علشان ندفا هنا
والقهوه تقول لنا
على بال النار ما تلسع
بتبقى حنـيّـنه
أنا وانتِ وأنا وانتِ