ليه يا أمينة - أمين حداد

الشمس بتضرب زمامير
وتفتح شبابيك الغرفة
يا حبيبتي دي كل العصافير
بتعيش وتموت بالصدفة

أنا عايش في الحلم الصيفي
والصوت اللي في ودني يشخلل
غويشاتك ياللي على كتفي
راح اشوفك إمتى وأصهلل

بفرد جسمي زي النيل
وارفع إيدي زي الدلتا
بيني وبينك صبر جميل
ساكنه في قلبي في أجمل حته

مش عارف اذاكر ولا افكر
وبازعق زي المجنون
أنا من غيرك ميه بسكر
لموناته مش لاقيه لمون

الألوان الغامقة رزينة
والألوان الفاتحة تغش
صور الزيت علشان الزينة
والصالونات معمولة بقش
صورتي لوحدي حزينة حزينة
صورتي معاكي عسل وطحينة
قاعدة لوحدك ليه يا أمينة
الأيام دي ما تتعوضش

أمين حداد من ديوان ريحة الحبايب