الأربعاء، أبريل ٢٠، ٢٠٠٥

كل الكل - فؤاد حداد


هات كل الدنيا تنوّر
هات كل الدنيا تغني


أنا صاحي الفجر وخايف
لا النسمه تكون قلقتها
أنا باسأل عنها لقيتها
الحلوه بتسأل عني
أنا زي الحنه في إيدها
هات كل الدنيا تغني
هات كل الدنيا تنوّر


أنا زي الحنه في إيدها
زي الحنه في الكف
باتشمّس تحت السقف
أنا ليله جديده وألف
زي الزغروطه في ريقها
هات كل الدنيا تنوّر
هات كل الدنيا تغني


زي الزغروطه في ريقها
تعرف للجنه طريقها
أنا قلبي الطاير طاير
بيسبح للي خالقها
أنا زي الحلم معاها
هات كل الدنيا تنوّر
هات كل الدنيا تغني


أنا زي الحلم معاها
الدنيا اللي مطاوعاها
م الفرحه مش سايعاها
والرايحة تقول للجايه
والحنه تقول للفل
هات كل الدنيا تنوّر
هات كل الدنيا تغني


الحنه تقول للفل
والشمس تقول للقمره
والريحه تقول للزينه
إحنا بقينا لبعضينا
هات كل الكل الكل
هات كل الدنيا تغني
هات كل الدنيا تنوّر


(من ديوان عيل على المعاش (الشخاليل

هناك ٥ تعليقات:

Shady Youssef يقول...

شكرا

moe يقول...

لا بجد!!!!!!!!!!!
(:

القصيدة دي بحبها جدا!!!!!و لسة كنت بتناقش مع جماعة صحابي من فترة قريبة انها لابسة منير و المفروض يغنيها!!!!!!

تاني صدفة النهاردة!!!!!!!

حـدوتـة يقول...

منير مفروض يغني حاجات كتير أوي بس هو باين عليه خلاص بقى بيستسهل :( فين أيام عقد الفل والياسمين أو الليلة يا سمرا (دول لفؤاد حداد) أو حتى شجر الليمون؟ خسارة والله...أملنا بقى في وجيه عزيز :)

اخبار اليوم يقول...

تسلم ايديك على الموضوع
اخبار اليوم-اخبار مصر

الربح من الانترنت يقول...

تسلم ايديك على الموضوع
الربح من الانترنت-وظائف خالية