الثلاثاء، أبريل ١٢، ٢٠٠٥

شوفي قد إيه - صلاح جاهين


يا بخت من يقدر يقول
واللي ف ضميره يطلَّعه
يا بخت من يقدر يفضفض بالكلام
وكل واحد يسمعه
يقف في وسط الناس ويصرخ : آه يا ناس
ولا ملام
ييجى الطبيب يحكي له ع اللي بيوجعه
يكشف مكان الجرح ويحط الدوا
ولو انكوى
يقدر ينوح
وانا اللي مليان بالجروح
ما اقدرش اقول
ما اقدرش ابوح
والسهم يسكن صدري ما اقدرش انزعه
شوفي قد إيه؟
احنا النهارده إيه في أيام السنه
شتا والا صيف
وفين أنا
إيه اللي وصّلنى هنا
أنا صاحب البيت والا ضيف
صوتي انحبس
ما اقدرش اقول
ما عرفش حاجه عشان اقول
ما اعرفش غيرك انتي بس
يا بت ياللي في حبك العقل اتهوس
مكان غريب
كأنه سجن كأنه مخدع لحبيب
كأنه بير
شباك حديد وعليه ستاير من حرير
والريح بينفد منه زي المسامير
الريح عوى
قلبى انقبض
قلبى اتلوى
الشمس تلج اصفر شعاعها صاروخ هوا
الضلمه تلج اسود كتير
ألوف ألوف القناطير
خبيني في شعورك يا بت
أحسن عروقى اتخشِّبت
شعرك خشن زى الحِرام الصوف يا بت
خبيني فيه م الزمهرير ..
ونَيِّميني في السرير
دخل النبى بردان خديجه لَفِّته
حَطِّت عليه غطيان لحد ما دَفِّته
دخل النبى بردان وقال: فين الغطا
البسمة غطت شفِّته

هناك ٤ تعليقات:

wa7ed mn masr يقول...

معلومة قد تفيد:من ديوان "عن القمر و الطين" أول دواوين صلاح جاهين صادر 1961

غير معرف يقول...

الله عليك يا عم صلاح ...
بحبك .. بحبك ... وكان نفسي أحضنك ...
....
ولسه بشوفك ..
ما بين السطور ..
بتنطق حروفك ...
بصدق الشعور ...
طفولة وشقاوة وحلاوة ..
وسحر وبراءة ....
وحزن وعتمة ونور ...
ألمح طريقي ..
وأعرف صديقي ..
يموت جوه قلبي ...
شيطان الغرور ..
......
بيرحل كلام ..
بيدبل يموت ...
ولسه كلامك ..
بيقدر يفوت ..
ف قلب الحياة ويرمي بذور ...


شكرا يا حدوتة

علي سلامة

اخبار اليوم يقول...

تسلم ايديك على الموضوع
اخبار اليوم-اخبار مصر

entrümpelung wien يقول...

شكرا على الموضوع
entrümpelung
umzug
Räumung
Kleintransport Wien
Wohnungsräumung Wien
botendienst Wien